Omapulo Nomayamukulo

T4P efupipiko lya za kelaka lyoshingolo lyoshiingilisa tashi ti “Transport for the People” sha hala okutya Iiyenditho yoshigwana. edhina ndika olya lukwa ngeyika nenenedhiladhilo lyoku ulikamo noku fatulula omalalakano go Projeka ndjika. Ngaka oga kwatela mo iiyenditho yaayehe yomiitopolwa ine yomoNooli, mwa kwatelwa wo, aayendi yokoompadhi. Momalalakano go projeka omwa kwatelwa woo okukonaakona, noku tala omukalo ngoka taku vulu oku hwepopaleka elongitho lyiiyenditho koongundu tadhi landula moshigwana: oongundu dhaamboka ye na iiyemo yaali hwepo, aakiintu moshigwana, aanona yosikola, noshowoo aanuulema.

 

Oshigwana shomiitopolwa yokuumbangalantu woshilongo, momimvo dha piti, osha kala noku indjipala momwaalu.Omolwa okuindjipala huka, iiyenditho moshitopolwa shuumbugantu nosho wo aantu yokoompadhi oya indjipala wo. Omalelo giilando noshowo oondoolopa oga pumbwa oku tula po omilandu dhoku tonatela omayinyengo giiyenditho miitopola yawo. Omilandu dhika haku tala owala omayinyengo gonena ihe oge na wo okukwatela mo onakwiiwa oshoka omwaalu gwaakwashigwana niiyenditho onkee ngaa tayi indjipala omumvo nomumvo. Oprojeka yo T4P otayi ka kwathela oodolopa dhokuumbangalantu opo dhi koke noku huma komeho, momukalo ngoka tagu kalele noku kwatela po elandulathano.Oshikwawo omalandulathano goT4P otaga ka yambidhidha mokukutha po omainda ngoka aakwashigwana yomiitopolwa yokuushayi ya taalela kombinga yiiyenditho mongashingeyi. Omilandu adhihe ndhika otadhi ka tulwa po momukalo gwelandulathano ewanawa.

Aakwashigwana oyendji haayehe ye na iiyenditho nenge ohauto dhopawumwene, onkee yi inekela miiyenditho yaayehe., ngaashi uubesa, nootaxi. Iiyenditho yaayehe mongashingeyi hayo naanaa oshoka oobesa inadhi gwanena aalongithi yiiyenditho, wo uutaxi owuna ondando yi li pombanda, uunene tuu moopate dhokuza nokuya komahala gokuushayi. Opuna ompumbwe yomulandu gwokutonatela iiyenditho yaayehe opo yi kale tayi vulu okulongithwa kwaayehe yo otayi vulu oku inekelwa, opo aakwashiwgwana ayehe ya mone ompito yoku gwedha ko koshako(ano economy) lyoshilongo.

Omanga inaa tu Tameka, nomanga inaa tu ninga omalongekidho goku eta po omalandulathano omape, otuna oku ninga omapekapeko, oku tala ngele otuna tuu oonzo dhiiyemo ya gwana, nosho wo aaniilonga ya gwana,oku tunga nokutonatela omulandu gwiiyenditho yaayehe omupe. Ayihe mbika oyina okuningwa, twa dhiladhila wo onakuyiwa yetu, nosho wo yoshigwana shokomongula. 2015 ogwa tothwa onga omumvo gwomapekaapeko. Opo tu tothe mo oompito nuudhigu tawu vulu okuholoka momalongekidho gomulandu gwa thanekwa. Omapekapeko otaga ka ningwa momukalo gwiigongi nomitumba dhomafatululo naakwashiwana, nosho tuu ayehe ya pambwa ku shika miitopolwa ayihe iinene monooli yoshilongo. Otamu ka kwatelwa wo egongelo lyuuyelele kombinga yomayinyengo giiyenditho yopaumwene, yaayehe, noshowo mbyoka yaaheshi iihauto moshitopolwa.

Oshikonga shika shomakonakono gomuule ota shi ka gongela uuyelele tawu monika po, opo ku ningwee omathaneko gu ukilila ompumbwe ndjoka yi li po, kwa ya omakuyunguto gaaluhe moshitopolwa, nokwa shilipalekwa kutya itaku teywa po omudhingoloko, ko ita ku thindile nando aantu konkalo ombwinayi. Momumvo 2016 omulandunenedhiladhilothaneko go projeka ndjika yo T4P, opo ihe tagu ka longekidhwa, sha ikwatelela kiizemo yomapekapeko giigongi ya ningwa momuvo 2015 ko kwa kwatelwa mo wo oompumbwe nomahalo gaayehe ya pambwa ku shika.

Omanga omapekapeko nomathaneko geli metifa, Uuministeli woshikondo shiiyenditho, neyambidhidho lyEhangano lyomapendulopo lyaNdowishi moshilongo, GIZ, onkene ya ipyakidhila noku konga omikalo dhokukwatela po omathaneko ngaka tagu kalele. Kakele kelongelokumwe mokutunga iiputudhilo yopombanda moshilongo, okwa thanekwa opo aaniilonga momahangano omaNamibia opo ya ka kuthe ombinga momadhewo gopaigwana pondje yoshilongo, ya ka dheulikike opo monakuyiwa Namibia a kale ta vulu oku eta po, okulonga mo noku tonatela omilandu dhiiyenditho yaayehe ta pumbwa. Shika otashi ningwea opo oshilongo shi kale tashi vulu oku ithikamena, no itaa pu kala aluhe ompumbwe yoku eta mo aanongononi ya za pondje yoshilongo

Omalalakano go projeka ndjika ogo ku kwatelwe mo kehe gumwe momulandu gwiiyeditho yaayehe, mwa kwatelwa wo oongundu dhaamboka ye na iiyemo yi li pevi miitopolwa yokuushayi. Etompelo ekwawo olyo ndika kutya opena ompumbwe yoondjila dhaamboka haya longitha iiyenditho ngaashi oombasikela, omatemba ga hilwa kiimuna, nosho wo aanona yosikola, oshoka oya taalela oshiponga shokupumwa komahauto kehe ethimbo tayaa longitha oopate ndhoka hadhi longithwa komahauto.

Oto vulu oku kwathela mo projeka ndjika noku tuma omadhiladhilo, nomagwedhelopo pamukalo gwetumwalaka kepandja huka.oto vulu wo oku tuma o email kondjukithi : info@transport4people.com.na, nenge wu tume okatumwalaka okafupi (ano oSMS) kongodhi tayi landula: 081 048 1870. Otaku ka ningwa wo iigongi yaayehe miitopolwa iinene ine (4) mo Nooli, momwedhi gwa Aguste 2015. Miigongi yoludhi nduka oto vulu okuya wu tu gwedhele po. Natu tumbule wo mpaka kutya ngoye oto ka kutha ombinga meukililo nenge pamikalo dhilwe metulomiilonga lyomulandu nguka, oshoka ihadhi gwanene. Kutha ano ombinga ngoye wu tu yambidhidhe mokuyambulapo omukalo gwiiyenditho ngoka gu li po ngashingeyi.

Participate and help us improve the current transport system!

Momathaneko gwomulandu nguka oompumbwe dhaayendi yokoompadhi odho tadhi ka tulwa komeho nokutalika tango, otaku ka landulwa kaalongithi yoombasikela, ya landulwa kaalongithi yiiyenditho yoompumbwe dhi ikalekelwa, opo ihe oompumbwe dhiiyenditho yokopate, ano iihauto opo tadhi ka talika ko.Shika otashi ningwa momukalo nguka oshoka egameno nepupaleko lyuuthikilo, olyo elalakano lyo projeka ndjika.

Omulandu gwiiyenditho yaayehe, mwa kwatela iiyenditho yaashi oohauto ogwaakwashigwana ayehe. Omulandu otagu ka pa aakwashigwana ehogololo lya gwana pokati komikalo dhi ili noku ili dhoku ya thikitha mpaka naampeyaka, mwa kwatelwa olupadhi, okulongitha uuthanguthangu (oombasikela), noku longitha oombesa noo taxi. Oshikondo shootaxi otashi ka kala wo sha mona aalongithi aape oyendji ngele opuna oopate oompe ndhoka dhi na uupu okulongitha unene poompito pamatulilo nomalondelo pomatsakaneno goondjila oonene.